IBRA DEMTOHET SERISH, JA SA DO TE MUNGOJE

Sport

Pas Kalulu vjen lajmi edhe për një tjetër të dëmtuar te Milani përpara sfidës me Napolin. Bëhet fjalë për Zlatan Ibrahimoviç. Kur mendohej se suedezi i kishte dhënë fund problemeve fizike, pas një problemi që e la jashtë për 9 muaj, ja tek vjen dëmtimi i radhës për sulmuesin. Ai ishte grumbulluar me përfaqësuesen e Suedisë përsëri dhe atje ka pësuar dëmtimin e radhës, që raportohet se është një problem muskulor në kofshë. Kështu, muaji prill mund të quhet ndoshta i mbyllur për të, pasi në klub mendojnë se atij do t’i duhen së paku dy javë për të kaluar këtë telash. 41-vjeçari Ibra ka luajtur shumë pak këtë sezon, pasi ka koleksionuar vetëm katër paraqitje në kampionat. Megjithatë, Milani nuk do të humbasë shumë në këtë drejtim në Ligën e Kampioneve, që është kthyer në objektivin kryesor të klubit në këtë muaj, pasi Ibrahimoviç ishte jashtë listës së lojtarëve të dërguar në UEFA.

Në frontin e përforcimeve të mundshme të Milanit për sezonin e ardhëm sinjalizohet një ftesë publike e bërë nga Leao për Dominik Szoboszlai, i cili është një objektiv i Milanit. Mesfushori ofensiv ishte pranë kuqezinjve në verën e vitit 2020, por si përfundim, një vit më vonë, 22-vjeçari u transferua te Leipzig. Paolo Maldini e pëlqen prej kohësh kur luante te Salzburg, ndërkohë që Rafale Leao e ka ftuar hapur t’i bashkohet kampionëve të Italisë. “Hajde te Milani”, ka shkruar ylli portugez në Instagramin e Szoboszlai, gjatë në postim ku shfaqet me fanelën e kombëtares hungareze, aty ku mban shiritin e kapitenit. 5 gola dhe 13 asiste numëron gjatë këtij sezoni me Leipzig, ku ka kontratë deri në vitin 2026.