Man.United, Bruno Fernandes rinovon kontratën; përfiton rritje të ndjeshme të pagës

Sport

Bruno Fernandes do të vijojë të jetë në qendër të projektit të Manchester United për një kohë të gjatë. Mesfushori portugez ka rinovuar kontratën e tij me ‘djajtë e kuq’ deri në vitin 2026, por më shumë se sa për kohëzgjajten e marrëveshjes, ky rinovim vjen për një rritje të ndjeshme në arkëtimet e lojtarit, sa i përket pagës dhe bonuseve. 27-vjeçari thuhet se do të përfitojë një rritje prej 35% të pagës në marrëveshjen fillestare mes palëve, ndërkohë që këtë herë janë përfshirë edhe shumë bonuse të reja, që vendosin edhe më shumë përgjegjësi mbi shpatullat e portugezit.

Që nga mbërritja e tij në ‘Old Trafford’ në janarin e 2020-ës, Bruno Fernandes numëron 49 gola e 39 asiste në 117 ndeshje të zhvilluara në të gjitha kompeticionet. Portugezi është kthyer në një nga të preferuarit e tifozerisë së Manchester United, çfarë ka qenë një faktor i rëndësishëm që drejtuesit e klubit të shtynin marrëveshjen me të deri në 2026-ën.

Vetë lojtari ndihet i lumtur me aventurën e tij në Angli, duke qenë se luan tek skuadra që e ka frymëzuar që kur ka qenë fëmijë, ndonëse nuk e fsheh dëshirën se kërkon që të luajë sezon pas sezoni për të fituar trofe madhorë. Për momentin, tek United nuk po e shijon diçka të tillë, pasi ‘djajtë e kuq’ në këtë sezon duket të jenë jashtë objektivave të tyre. Bruno Fernandes u bë pjesë e Manchester United pasi një transaksioni që i kushtoi klubit anglez plot 63 milionë euro, për ta transferuar mesfushorin nga skuadra e Sportingut.