Rrugëtimi në një qytet të mrekullueshëm turistik ishte si një ëndërr. Kudo që shkoje sytë shihnin vetëm ngjyrën e bardhë, që njëherazi simbolizon paqen. Ky vend quhet Alberobello, që ka kuptimin “Pemë e bukur” (Albero-pemë, bello-bukur) dhe është provincë e Barit që gjendet në Puglia të Italisë.
Origjina e qytetit i përket fundit të shekullit XV. E ndodhur mbi dy relieve kodrore, të ndarë në lashtësi nga një shtrat, gjendet qyteti i Alberobellos me rreth 11.000 banorë, te cilin vizitorët e shumtë kureshtar i kthen dy shekuj në kohë, në periudhën e sundimit brutal feudal në këtë pjesë të Italisë.
Mbi kodrën jugore, ndodhet qyteti i ri me karakteristika moderne, kurse në tjetrën atë perëndimore, shtrihen ndërtesat e pazakonshme “trullet”, të ndërtuara nga mbreti i Napolit. Ndonëse nën sundimin e spanjollëve, Mbretëria e Napolit, ka qenë forcë e madhe në Itali, por edhe qyteti më i madh në tërë Evropën.
Trullet janë banesa me formë cilindri që mbarojnë në formën e një koni, të gjitha të ndërtuara me gurë, pa përdorur llaç, dru ose materiale të tjera mbajtëse ose lidhëse.
Alberobello është qytet i gurit, dhe trullet janë një shembull i jashtëzakonshëm i përshtatjes së njeriut në një territor ku nuk ishte e mundur të ndërtoheshin banesa dhe të organizohej një vendbanim i qëndrueshëm.
Trullet, simbol i varfërisë, janë sot dëshmi historike dhe kulturore, si dhe burim ekonomik dhe turistik.
Fjala “trull” tregon shtëpitë tipike të bardha me çati ne formë koni. Origjinat e formës dhe të strukturës së jashtme, një cilindër i kaluar në kon, janë shumë të lashta.
Muret janë të lyera bardhë, mbi të cilat spikasin gurët e hirta të kupolës konike të formuar nga unaza bashkëqendrore, gurë, që zvogëlohen nga poshtë – lartë.Çatia e trullit mbaron me maje. Në përgjithësi formohet nga tre gurë të vendosura sipër, një i formës cilindrike, një i formës gjysmë rrethore dhe një i formës sferike.
Një numër më i madh i trulleve të grupuara lirisht me njëra tjetrën formojnë të ashtuquajturën “Trullia” p.sh. një grup ndërtesash, verandash, bahçesh të vogla, stallash, ose kopshte të perimeve me gardhe të vegjël në të cilët mund të hyjë vetëm e zonja e shtëpisë.
Në dhjetor të vitit 1996 Trullet e Alberobellos janë njohur nga UNESCO Pasuri e Mbarë Njerëzimit.
