Duket se shtëpia e famshme e modës, ia ka dalë mbanë të zemërojë mbarë Kinën. Marka është akuzuar për shfaqje racizmi, pasi në 3 reklamat e publikuara së fundmi, shfaqet një vajzë kineze të cilës i “mësohet” se si të përdorë shkopinjtë.Videot titullohen “Të hash me shkopinj”, por në këtë rast bëhet fjalë për ushqime italiane. Një burrë në sfond, i tregon hap pas hapi vajzës se çfarë duhet të bëjë. Sapo reklamat janë postuar, kanë vërshuar komentet në çdo rrjet social, duke i cilësuar ato si tejet ofenduese. Debati është përshkallëzuar akoma më tepër, kur vetë Stefano Gabbana është përfshirë në biseda me komentuesit.
Stefano, njihet tashmë si një person që krijon të tilla polemika. Mjafton të kujtojmë faktin që stilisti e quajti publikisht Selena Gomez “të shëmtuar”, apo fustanin e dasmës së Chiara Ferragnit si “tepër të lirë dhe pa shije”. Stefano është përfshirë në një shkëmbim mesazhesh me komentuesit, deri sa në fund deklaroi se Instagrami i tij ishte vjedhur. Por, duke parë mënyrën sesi ai ka komunikuar më përpara edhe me personalitete të tjera, dyshojmë se Instagrami i tij është vjedhur vërtetë. Pas gjithë kësaj rrëmuje, sfilata “The Great Show” që shtëpia e modës do të zhvillonte këtë javë në Shanghai, është anuluar zyrtarisht nga departamenti i çështjeve kulturore në Shanghai.
