Të hënën Raphael Varane mundi të stërvitej me skuadrën, kjo pas goditjes që pësoi në fundjavë në gju. Pas fitores 4-1 me Valencian, shtatlarti francez u ankua për dhimbje në të njëjtin vend ku qe operuar në vitin 2012-të. Kur mbeten edhe më pak se 2 javë nga sfida në Champions League me PSG, mbrojtja është nyja më e dobët e Los Blancos. Skuadra e Zidane ka pasur të lënduar edhe Sergio Ramosin, por ky i fundit u rikthye në javën e dytë të janarit. Përveç Varane, shqetësuese ka qenë edhe gjendja e Vallejos. Ndërkohë për 24-vjecarin francez, gazeta AS përmendi historikun e lëndimit të 6 viteve më parë, ku në maj të 2012-ës ai qe operuar. Në Valdebebas Varane do të mbahet në monitorim. Ai ka pasur shpesh shqetësime, Sipas gazetës AS, 24-vjecari nuk luan më shumë se tre ndeshje radhazi që prej muajit tetor të vitit të kaluar. Kështu Zidane pritet të mos e grumbullojë francezin në sfidën kundër Levantes kjo duke pasur si prioritet përballjen e 14 shkurtit me PSG në Bernabeu. Ndërkohë duke folur për PSG, Kylian Mbappe do të jetë i gatshëm për t’u hedhur në fushë në këtë sfidë. Pas shembjes që pësoi në përballjen me Lyonin, Mbappe u vu në monitorim nga stafi mjekësor, por trajneri Unai Emery njoftoi në fillim të javës se 19-vjecari është stërvitur normalisht me grupin dhe me shumë gjasa do jetë “ok” për sfidën në Madrid.
