Teksa Manuel Neuer pritet të rikthehet në fushë pas një mungese të gjatë, paralelisht, Bayern Munich është duke përgatitur një surprizë për portierin në fjaë. Sikurse raportojnë mediat e huaja, kampionët e Gjermanisë janë duke përpiluar një kontratë të re në drejtim të gardianit 37 vjeçar.
Marrëveshja aktuale e Neuer me klubin bavarez përfundon në verën e 2024-tës, por është mëse e besueshme që palët të vazhdojnë bashkë, të paktën edhe për një tjetër sezon. Pra, marrëveshja e re, parashikohet të rinovohet minimumi edhe për një tjetër vit, por është e mundur që në tavolinë, oferta të jetë edhe dy vjeçare.
Manuel Neuer është pjesë e Bayern Munich që prej verës së 2011-tës, e përgjatë këtyre 12 viteve ka qenë një prej lojtarëve më të rëndësishëm të klubit gjerman. Në total janë 489 ndeshje të luajtura në të gjitha kompeticionet, ndërsa trofetë e fituar janë plot 30-të, përfshirë këtu 11 tituj kampionë të Bundesligës dhe 2 tituj të Champions League.
Neuer cilësohet një simbol i Bayernit, e ndonëse 37 vjeç, drejtuesit e klubit janë besimplotë se gardiani në fjalë mund të luajë ende në nivele të larta.
Në Dhjetor të 2022-shit, teksa ishte me pushime, Neuer pësoi një frakturë në këmbë, e si pasojë mungoi të gjithë pjesën e mbetur të sezonit. Madje, ai ende nuk është në dispozicion të trajnerit Thomas Tuchel, ndonëse duhet theksuar se rikthimi i tij shihet shumë pranë. Portieri ka nisur stërvitjen, ndërsa pak nga pak, por kthehet në formën optimale. Ai konsiderohet titullari absolut i katërkëndëshit të Bayernit, e për këtë arsye, klubi e ka pritur kaq shumë, pa nënshkruar me një tjetër portier për një periudhë afatgjatë.
