Kështu është prezantuar përmes gjuhës shqip, Ansi Agolli te amerikanët e Neë York Cosmos, teksa ka zhvilluar edhe stërvitjen e parë me skuadrën e tij të re. Ndër të tjera, klubi në prezantimin e futbollistit shqiptar, publikoi disa statistika nga karriera e ish-lojtarit të Tiranës, që ka 73 ndeshje zyrtare me Kombëtaren shqiptare, duke përfshirë këtu dhe pjesëmarrjen në finalet e Evropian francez në vitin 2016. Ai vjen nga një eksperience 9-vjeçare në kampionatin e Azerbajxhanit me “Qarabag”, ku fitoi edhe pesë tituj kampionë. Ndërsa me këtë ekip debutoi dhe në grupet e Ligës së Kampionëve si dhe në Ligën e Europës.
Ndërkohë, në klubin amerikan sigurisht që janë shumë të lumtur që kanë afruar një futbollist me kaq eksperiencë sa Agolli. Trajneri Carlos Mendez u shpreh me superlativa për lojtarin shqiptar. “Në këto pak ditë që ka qenë këtu, cilësia e tij është e dukshme dhe tifozët e Kozmos do të argëtohen duke parë në këtë sezon. Pavarësisht të gjithë gjërave që ka arritur, ai mbetet një lojtar i përulur, i cili vjen të punojë ende me pasion të madh në stërvitje”, ishin fjalët e teknikut, i cili është tërhqeur nga futbolli 1 sezon e gjysmë më parë dhe me moshë është vetëm 2 vjet më i madh sesa Agolli.
