Jurgen Klopp ka nevojë për pushim. Pasi të përfundojë aventurën me Liverpool, trajneri gjerman është shprehur se të paktën një vit do qëndrojë totalisht i tërhequr nga aktiviteti.
“Pasi të mbyll kontratën me Liverpool, për një vit, do pushoj dhe nuk do bëj absolutisht asgjë. Kam nevojë të pushoj”, janë fjalët e teknikut 55 vjeçar.
Klopp është pjesë e Liverpool që prej 2015-tës dhe ky është sezoni i tij i 8-të me The Reds. Ndryshe, kjo përkthehet si periudha më afatgjatë e tij në drejtimin e një klubi, krahasuar këtu me dy eksperiencat e mëparshme në Gjermani, si me Borussia Dortmund, ashtu edhe me Mainz.
Kontrata e tij aktuale me Liverpool, e rinovuar disa muaj më parë, përfundon në verën e 2026-tës, atëherë kur Klopp do jetë 59 vjeç.
Më tej, numri një I pankinës në “Anfield” ka deklaruar se plani I tij në të ardhmen është që të kthehet në Gjermani, por nuk është I sigurt nëse do të kthehet edhe për të trajnuar ndonjë skuadër. Sidoqoftë, Klopp ka thënë, se sido që të shkojë, edhe nëse karriera e tij do mbyllej vetëm me skuadra si Mainz, Dortmund dhe Liverpool, ai sërish do të ishte shumë I kënaqur për të gjithë atë që ka arritur përgjatë këtyre viteve.
