Boston Celtics, Memphis Grizzlies dhe Washington Wizards janë përfshirë në një nga shkëmbimet më të rëndësishme të kësaj vere, që mund të ndryshojë jo pak gjërat në ambiciet e këtyre skuadrave. Në mënyrë të papritur, Celtics kanë vendosur të heqin dorë nga Marcus Smart, duke e lejuar 29-vjeçarin, që vitin e shkuar u shpall edhe lojtari më i mirë mbrojtës në NBA, të transferohet tek Memphis Grizzlies. Këta të fundit do të sakrifikojnë Tyus Jones, i cili do të kalojë tek Washington Wizards, e po ashtu një zgjedhje të raundit të parë në ‘Draft’ e po ashtu një nga katër zgjedhjet e para në ‘Draft’-in e vitit të ardhshëm. Ndërkohë Celtics, veç largimit të Smart, duhet të bëjnë llogaritë edhe me largimet e Danilo Galinarri-t dhe Mike Muscala, po ashtu të transferuar drejt Ëizards, për të marrë në shkëmbim shtatlartin letonez, Kristaps Porzingis. Më mbërritjen e këtij të fundit, Celtics shpresojnë të kenë zgjidhur problemin e qendrës, që i ka hapur jo pak telashe skuadrës nga Masaçusets. Tek Grizzlies po ashtu bëjnë një lëvizje me shumë peshë sa i përket afrimit të Smart, duke marrë në konsideratë largimin e Dillon Brooks dhe pezullimin e gjatë të Ja Morant. Ndërkohë që ata të Wizards vazhdojnë projektin e tyre të rindërtimit dhe Jones mund të jetë një element i rëndësishëm për të ardhmen, teksa tani kryeqytetasit kanë në dorë edhe një seri zgjedhjesh në ‘Draft’-e.
Marcus Smart largohet nga skuadra e Celtics pas 9 vitesh, pasi ishte zgjedhur i gjashti në ‘Draft’-in e 2014-ës pikërisht nga Bostoni. Ndërsa Porzingins, pas aventurës me New York Knicks, që e përzgjodhën në 2012-ën, luajti për 3 vite tek Dallas Mavericks, para se të shkonte tek Wizards, ku e mbyll pas vetëm një viti.
