Charlotte Hornets janë duke provuar të gjitha mënyrat për të bërë surprizën në këtë fund sezoni të NBA. Skuadra nga Karolina e Veriut ka regjistruar fitoren e 4 radhazi, pasi mposhtën me rezultatin 137-128 skuadrën e New York Knicks. Koha e rregullt në fakt përfundoi në barazim 117-117, por vendasit e Charlotte ishin më këmbëngulës në fundin e shtesës.
Trey Burke i New York Knicks ishte shënuesi më i mirë i ndeshjes me 42 pikë, ndërsa shërbeu edhe 12 asiste, shifra që shënojne një rekord personal për karrierën e tij. Nga ana tjetër, tek Hornets, vendimtar ishte sërish Kemba Walker që e mbylli takimin me 37 pikë të shënuara.
Në këtë mënyrë, Charlotte vazhdon të mbetet pjesë e luftës për një vend në zonën “play-off” në Konferencen e Lindjes, që tashmë veç Toronto Raptors, Boston Celtics dhe Cleveland Cavaliers, ka njohur edhe 2 skuadrat e radhës që kualifikohen për në fazën finale të basketbollit amerikan. Bëhet fjalë për Indiana Pacers dhe Philadelphia 76ers, me këta të fundit që arritën një fitore të rëndësishme 123-104 ndaj Denver Nuggets.
