Arsene Wenger vijon të shijojë futbollin nga televizori, pasi tekniku francez nuk është angazhuar me asnjë skuadër që pas largimit të tij nga Arsenali në qershorin e 2017-ës. 69-vjeçari ka shprehur dëshirën që shpejt të rikthehet sërish të bëjë atë që ai di më mirë, teksa veç klubeve, një alternativë interesantë për të është edhe drejtimi i një kombëtareje në botërorin e vitit 2022. Por ofertat për Wenger duket se nuk kanë munguar. Është vetë tekniku francez që deklaron se ka patur mundësinë të drejtojë sërish në ‘Premier League’, ku i janë propozuar disa oferta nga skuadra të ndryshme, të cilat Wenger vendosi të mos i zbulojë. Por 69-vjeçari thotë se mbetet besnik i Arsenalit dhe e ka shumë të vështirë të pranojë oferta nga klube të tjera angleze.
Francezi nuk nguroi të bëjë edhe një përshkrim të punës që ka bërë deri më tani tekniku aktual i ‘topçinjve’, duke u shprehur se për Unai Emery, gjërat janë shumë më të thjeshta. Wenger u ndal gjatë tek fakti që tani arritja e katër vendeve të para, që të siguron pjesëmarrjen në ‘Champions League’, konsiderohet si një sukses i madh, kjo edhe për shkak të konkurencës së lartë. Por Wenger tha se në kohën e tij, të gjitha klubet e mëdha synonin të ishin patjetër pjesë e luftës për titull, diçka që vitet e fundit po dominohet nga dyshja Manchester City dhe Liverpool. Së fundmi, ish-trajnerit të Arsenalit i është propozuar një ofertë për t’u bërë shefi i zhvillimit të futbollit në FIFA, ofertë së cilës francezi ende nuk i ka kthyer një përgjigje.
