Giorgio Chiellini njofton tërheqjen nga kombëtarja italiane. Në moshën 38 vjeçare mbrojtësi veteran ka vendosur të bëjë një hap prapa nga ekipi përfaqësues. Njoftimin e ka dhënë vetë lojtari, i cili është shprehur se ka ardhur momenti që të reflektojë mbi të ardhmen.
Chiellini ka bërë të ditur se ndeshjja e fundit me azzurët do jetë ajo ndaj Argjentinës, që do zhvillohet në 1 qershor në Wembley, aty ku kampionët e Europës do përballen me kampionët e Amerikës Latine, dhe në fund, fituesi do kurorëzohet me një trofe.
“Në moshën 38 vjeçare është normale të ndalosh dhe të reflektosh. Nëse gjithçka do shkojë mirë, unë do i jap lamtumirën ekipit kombëtar në Wembley, aty ku arrita kulmin e karrierës time me triumfin në Euro 2020”, është shprehur ndër të tjera mbrojtësi i qendrës.
Me Italinë, Chiellini ka luajtur 116 ndeshje në total, e në 21 prej të cilave ka mbajtur në krahë shiritin e kapitenit.
Po ashtu, me kontratën që i përfundon në fund të sezonit, shtatlarti ka thënë se do reflektojë edhe rreth të ardhmes së tij me Juventusin, por vendimin do e bëjë publik pas finales së 11 Majit në Kupën e Italisë ndaj Interit.
