Lionel Messi do të largohet nga PSG në fund të sezonit. Ky është lajmi që ka pushtuar të gjitha mediat sportive, me kampionin e botës që tashmë duket se e ka vendosur përfundimisht të ardhmen e tij. Ndonëse nuk mund ta ketë përcaktuar ende se ku do të luajë, e sigurt është që 7 herë fituesi i Topit të Artë nuk do të zbresë më në Parc des Princes.
Vizita e tij e fundit në Arabinë Saudite, pa lejen e klubit, ka nxjerrë në pah disa të vërteta të pathëna më parë. Fluturimi i papritur i Messit drejt Lindjes së Mesme, shërbeu për të thyer përfundimisht marrëdhënin e tij me klubin parizien.
Vendimin për t’u larguar nga Parku i Princave, Messi e ka marrë një muaj më parë, teksa në mbyllje të këtij edicioni futbollistik nuk do të jetë më pjesë e gjigantëve të Ligue 1, por do të largohet me parametra zero. Ikja me pushime e Messit në Arabi, atje ku është edhe ambassador i turizmit, ka irrituar tej mase edhe tifozët e Parisit, të cilët një veprim të tillë e kanë konsideruar të patolerueshëm, e për këtë arsye janë ngritur në protestë duke kërkuar largimin e bordit drejtues dhe duke kërkuar gjithashtu edhe largimin e disa lojtarëve të mbivlerësuar në ekip, sikurse janë Messi, apo edhe Neymar.
Klubi ka marrë masa ndaj Messit, duke e pezulluar në dy ndeshjet e ardhshme në kampionat. Madje, argjentinasi nuk do të ketë mundësi që të stërvitet me pjesën tjetër të ekipit. Gjithësesi, nëse do të zbresë më në fushë këtë sezon, është mëse e mundshme, që Messi të fërshëllehet nga tifozët e skuadrës, diçka që ka ndodhur edhe disa kohë më parë.
