Pasi ka përjetuar një epskeriencë në Spanjë dhe një tjetër në Francë, Neymar JR po bëhet gati të ndërrojë skuadër. Më tepër sesa vetë dëshira e futbollisitit për t’u larguar nga PSG, pritet të jetë vendimi i klubit parizien që në merkaton e kësaj vere, të ndajë rrugët me brazilianin.
Të paktën kështu nënvizohet në mediat britanike, se klubi kampion i Ligue 1 nuk e shikon sulmuesin pjesë të planeve për të ardhmen, ndonëse ky i fundit ka të vlefshme një kontratë edhe për 2 edicione të tjera.
Situata e Neymar në qytetin e dritave ka ardhur duke u përkeqësuar, sidomos këtë edicion futbollistik. Fillimisht, ai është konfliktuar me shokët e skuadrës, duke i akuzuar ata për rezultate të dobëta, çka solli në këtë mënyrë edhe tension në dhomat e zhveshjes. Ky veprim i yllit brazilian ka shkaktuar edhe reagimin e tifozëve të klubit, të cilët kërkojnë largimin e tij nga skuadra, pasi e konsiderojnë 31 vjeçarin të padobishëm në fushën e lojës.
Në një panoramë si kjo, Neymar e ka kuptuar se nuk preferohet më në “Parc des Prines”, e për këtë arsye po planifikon të bëjë hapin e radhës. Ish-lojtari i Barcelonës ëndërron të luajë në Premier League. Manchester United është klubi që më herët ka treguar interes për të firmosur me anësorin e sulmit, por mbetet për t’u parë nëse 20 herë kampionët e Anglisë do provojnë ta bëjnë diçka të tillë përgjatë merkatos së verës.
I transferuar në radhët e PSG në 2017-tën për shifrën e 222 mln eurove, Neyar vijon të jetë ende lojtari më i shtrenjtë i historisë së futbollit.
