Marka britanike e linjës së modës Topman, ka mërzitur tejmase tifozët e Liverpoolit kjo për shkak të një modeli bluze që hodhi së fundmi në treg. Kjo bluzë e kuqe mbante pas numrin 96-të dhe kishte si nënshkrim aforizmën “What goes around comes back around”. Por në mënyrë krejt rastësore e kuqja dhe numri 96-të ngjallin në Liverpool ngjarjen tragjike të Hillsborough ku 96 persona mbetën të vdekur pas tejmbushjes së një prej tribunave kryesore në sfidën që të kuqtë kishin me Nottingham Forestin.
Ngjarja e 29-të viteve më parë mbetet tejet e ndjeshme dhe reagimet kanë qenë tejet të ashpra për këtë rast. Modeli i dizejnuar nga kompania Topman ishte hedhur në 450 dyqanet e saj dhe po kështu edhe on-line, me vlerë vetëm 20 paundë. Tifozët e Liverpoolit nisën menjëherë komentet në seri duke e konsideruar këtë si një ofendim ndaj kujtimi të atyre që humbën jetën më 15 prill 1989-të. 38 nga 96 viktimat ishin të moshës 10 deri 19-vjeç.
Ajo që acaronte më tej tifozët ishte fakti se në krahun e djathtë kompania kishte shkruar fjalët “karma”. Edhe pse justifikimi ishte se fjalët dhe numri kishin të bënin me një këngë të Bob Marley-it kjo nuk e ka shpëtuar bluzën që të mos hiqej nga tregu, të paktën në platformat on-line. Kompania nxitoi ta largojë ndërsa të shumtë janë ata që kërkojnë një ndjesë publike.
